இப்படித்தான்
எனது காதலை
சொல்லத் தெரிகிறது..
கடந்து செல்லும் பொழுது
செல்ல இடிஇடித்தும்
தூங்கும் பொழுது
மீசையை பிடித்திழுத்தும்
சாப்பிடும் பொழுது
விரல்கடித்து கவளம் வாங்கியும்
வீட்டுக்குள் வரும் நேரம்
கதவுபின் ஒளிந்து
கண்ணாமூச்சி காட்டியும்
என் காதலை வெளிப்படுத்துகிறேன்..
சிறுபிள்ளைத்தனமாய்
இருந்தாலும்
என் பெரும் காதல் இது 💕💕
தீராக் காதலில்
திளைத்துக்
கொண்டிருக்கிறாய்..
இருந்து கொள்..
ஆனால்.......
பலமாய்
பற்றிக் கொண்டிருக்கும்
உன் பேரன்பின்
இறுக்கமான
பிடிதனில்
தன் வர்ணம் இழந்து
பலம் இழந்து
விரக்தியடைந்து
மெல்லச் சாகும்
பட்டாம்பூச்சியை
ஏதேனும்
எறும்புகள்
இழுத்துச் செல்லும்
பொழுதாவது
அறிந்து கொள்வாயா ??
மென்மையான
பட்டாம்பூச்சிக்கும்
மெல்லிதயம்
உண்டென்று.. !??
